ចម្លើយ​មិន​ពិបាក​យល់​នោះ​ទេ។ វា​ជា​រឿង​ធម្មតា ដែល​កុំព្យូទ័រ​ប្រើ​តែងតែ​ស៊ី​ថាមពល​ថ្ម មុន​និង​ក្រោយ​ក៏​ត្រូវ​តែ​អស់ ហើយ​បញ្ចូល​ឡើង​វិញ។ តែ​បើ​ប្រើ​ឆាប់​អស់​នោះ​គឺ​អាស្រ័យ​លើ​កត្តា​ច្រើន ពោល​គឺ​មិន​ដោយសារ​កម្រិត​ថាមពល​ថ្ម​តែ​មួយ​មុខ​នោះ​ទេ។ ចំណុច​បន្ទាប់បន្សំ​ក្រៅ​ពី​គុណភាព​ថ្ម​ហើយ​នោះ គឺ​ស្ថិត​នៅ​ត្រង់​តំហែទាំ​ថ្ម​តាម​របៀប​ជា​ច្រើន។ ប្រសិន​ប្រិយមិត្ត​ចេះ​វិធី​ថែទាំ​ថ្ម Laptop ខ្លះៗ វា​មិន​ត្រឹមតែ​ធ្វើ​ឱ្យ Laptop របស់​អ្នក​កាន់​ថ្ម​បាន​យូរ​ទេ តែ​ថែមទាំង​ធ្វើ​មិន​ឱ្យ​វា​ងាយ​ឆាប់​ខូច​ថ្ម​ទៀត​ផង។
ចុង​សប្ដាហ៍​នេះ Sabay នឹង​លើក​យក​ពី​វិធីសាស្ត្រ​ខ្លះៗ​ក្នុង​ការ​ថែទាំ​ថ្ម​ឱ្យ​ប្រើ​បាន​យូរ និង​កាត់​បន្ថយ​ការ​ស៊ី​ថាមពល​ខ្លាំង​ដូច​ខាងក្រោម៖
១ ដំបូង​យើង​អាច​ធ្វើការ Defrag ដើម្បី​ឱ្យ Hard Drive ធ្វើ​ការ​តម្រៀប file ដែល​នៅ​កន្លែង​ផ្សេង​គ្នា​ទៅ​តាម Blog និង​តាម​ប្រភេទ file ដែល​ស្ថិត​នៅ​ក្នុង Sector នីមួយៗ​ក្នុង Hard Drive។ ធ្វើ​ដូច្នេះ​គឺ​ដើម្បី​ងាយស្រួល search រក​អ្វី​មួយ​បាន​លឿន។ ពីព្រោះ​មិន​ថា​កម្មវិធី ឬ Windows នោះ​ទេ​គឺ​តែង​ទៅ​ស្វែងរក file បន្ថែម​ដែល​គាំទ្រ​ឱ្យ​កម្មវិធី ឬ​ប្រព័ន្ធ​ប្រតិបត្តិការ​អាច​ប្រព្រឹត្តិ​ទៅ​បាន។ ចុះ​ហេតុ​អ្វី​បាន​ជា​ត្រូវការ​តម្រៀប?
ជា​រឿង​ធម្មតា​ទេ លើ Hard Disk តែង​មាន​ការ Copy ចូល​ក៏​តែង​មាន​ការ Delete ផង​ដែរ។ ការ​លុប​ទៅ​វិញ​នោះ​ហើយ ដែល​ធ្វើ​ឱ្យ sector ដែល​ផ្ទុក​នៅ​សល់​ចន្លោះ​ទំនេរ​ទើប​ធ្វើ​ឱ្យ blog រក្សា​ទិន្នន័យ​មាន​ចន្លោះ​ទំនេរ ហើយ​ទម្រាំ Windows ឬ​កម្មវិធី​ទៅ​ស្វែងរក​ឃើញ​ចប់​សព្វគ្រប់​គឺ​ត្រូវ​ចំណាយ​ពេល​យូរ ដែល​ជា​ហេតុ​មួយ​ធ្វើ​ឱ្យ​មាន​ការ​ចំណាយ​ថាមពល​ថ្ម​ច្រើន។ (ចំណាំ៖ នៅ​ពេល Defrage សូម​ដោត Plug Adapter ដើម្បី​កុំ​ឱ្យ​វា​ទាញ​ថាមពល​ពី​ថ្ម​ខ្លាំង​នាំ​ឱ្យ​ឆាប់​ខូច)។
២ កុំ​ដាក់​ឱ្យ​មាន​កម្មវិធី Run នៅ​លើ Background ច្រើន​ពេក​ដូច​ជា Wallpaper ដែល​មាន​ចលនា ព្រោះ​នាំ​ឱ្យ​ដំណើរការ CPU ខ្លាំង ដែល​នេះ​ក៏​ជា​ចំណុច​មួយ​ធ្វើ​ឱ្យ​ការ​ប្រើប្រាស់​ថ្ម​បាន​រយៈពេល​យូរ​ដែរ។
៣ បើ​ចង់​ផ្អាក​ប្រើ Laptop បណ្ដោះ​អាសន្ន​គួរ​ប្រើ Hibernate កុំ​ប្រើ Standby ឬ Sleep។ ការ​ប្រើ Standby ឬ Sleep នៅ​ពេល​ទុក​វា​ចោល Hardware មួយ​ចំនួន​ធំ​នៅ​តែ​ដំណើរការ ដោយ​ឡែក​ប្រើ Hibernate ជា​ជម្រើស​ល្អ​ជាង​ព្រោះ​អាច​បិទ​ដំណើរការ​បាន។ នេះ​ក៏​អាច​ចាត់​ទុក​ជា​វិធីសាស្ត្រ​ល្អ​មួយ​ជួយ​ឱ្យ​ថ្ម​ប្រើ​បាន​យូរ និង​ជៀសវាង​ឆាប់​ខូច​ថ្ម ឬ​អាច​ឈាន​ដល់​ប៉ះពាល់ Hardware ទៀត​ផង។
៤ សាមញ្ញ​មួយ​ទៀត​គឺ​ថា នៅ​ពេល​អ្នក Copy ទិន្នន័យ​អ្នក​អាច​បិទ Screen Laptop ដើម្បី​កុំ​ឱ្យ​យក​ថាមពល​មក​ប្រើ​លើ​អេក្រង់​ដែល​យើង​ពុំ​ត្រូវការ​ធ្វើ​អ្វី​ផង​នោះ ព្រោះ​វា​ស៊ី​ថ្ម​ចោល​អត់​ប្រយោជន៍។ អ្នក​ក៏​អាច​ចូល​ទៅ Manage Power Option ដើម្បី​កំណត់​រយៈពេល​ឱ្យ​កម្រិត​ពន្លឺ​អេក្រង់ (Brightness) របស់​វា​មិន​សូវ​ភ្លឺ ក្នុង​រយៈពេល​ណា​មួយ ឧទាហរណ៍​រយៈពេល ៥នាទី។
៥ Multi Task៖ គួរ​ចៀសវាង​ការ​បើក​កម្មវិធី​ច្រើន​ក្នុង​ពេល​តែ​មួយ ទាំង​ដែល​កម្មវិធី​ខ្លះ​មិន​ប្រើ​ផង​នោះ។ ព្រោះ​ការ​បើក​កម្មវិធី​ច្រើន​ធ្វើ​ឱ្យ CPU ដំណើរការ​ខ្លាំង ហើយ RAM ក៏​បន្ថែម​បន្ទុក​នៃ​ទំហំ​កាន់​តែ​ច្រើន​ដែល​មិន​ត្រឹម​ធ្វើ​ឱ្យ​ថ្ម​ឆាប់​មាន​បញ្ហា​ទេ តែ​ក៏​ឆាប់​បណ្ដាល​ឱ្យ CPU និង RAM ឆាប់​ចុះ​ខ្សោយ​និង​អាច​ឈាន​រហូត​ដល់​ខូច​បាន។
៦ គួរ​ដំណើរការ​កម្មវិធី​លើ Hard Drive ជា​ជាង​លើ CD ឬ DVD ROM ព្រោះ​នេះ​ក៏​អាច​ធ្វើ​ឱ្យ CPU ដំណើរការ​ខ្លាំង ដោយ​សារ Device ផ្សេង។ ម្យ៉ាង​ទៀត ប្រសិន​ចង់​ដំឡើង Windows គួរ Set up ចេញ​ពី flash ក៏​បាន​ព្រោះ​ចំណាយ​ថាមពល​ថ្ម​តិច​ជាង​តាម CD ROM។
៧ កាត់​បន្ថយ​ការ​ដោត External Hard Drive, USB និង Mouse ព្រោះ​ទាំង​នេះ​ក៏​ជា​ចំណែក​ធ្វើ​ឱ្យ​មាន​ការ​ប្រើប្រាស់​ថ្ម​ខ្លាំង ព្រោះ​ពេល​ដោត វា​ត្រូវ​ការ​ថាមពល​មួយ​ចំនួន​ដើម្បី​អាច​ដំណើរការ​បាន។